Born to fly

I Jesaja 40.31 seit Gott, dass we mir uf ihn vertroue, mir nöii Chraft überchöme u mir wärde ufstige wie en Adler mit göffnete Flügu.

I dere Wuche hei mir d’Parallele zwüsche Gott, Adler u üs Mönsche betrachtet:

Vision entwickle: Bevor e Adler e Sturzflug uf sini Büti macht, muess är sie aus Ziu avisiere u im Blick bhaute. Genauso isches mit de Visione, wo Gott für üses Läbe het. Mir müesse sie entdecke u im Blickfäud bhaute. Gott dänkt gross vo dir, drum gib di nid mit chlinem zfriede.

Komfortzone verlah: Dr Adler lehrt flüge, idäm dass är usem Nest usegschosse u ufgfange wird bevor är am Bode ufprallt. Ou mir müesse üsi Komfortzone verlah, damit mir chöi lere üsi Bestimmig z’läbe. Gott cha jede bruche, süsch hätti är di nid gmacht u we du mit sinere Chraft rächnisch, de isch dis Läbe e Zündschnuer mitere riiese Rakete.

Stürm im Läbe: We dr Adler ine Sturm chunnt bhauted är sini Flügu offe, damit sie ihn ganz höch ufe trage u dr Sturm ihn cha stärche. Ou mir söue üs mit Gott a dr Hand i Sturm begäh u vertroue, dass mir gstärkt usem Sturm wärde usecho.

Pfleg dis Läbe: Dr Adler süberet sis Fäderchleid jede Tag u schrisst aui kaputte Fädere us, damit nöii u gsungi chöi nachewachse. Ou üsi Beziehig zu Gott brucht ihri Pfleg. Mir müesse aue Dräck entferne u kaputti Fädere usrisse, damit Gott öpis nöis u bessers cha wachse la. D’Pfleg vor Beziehig cha verschiede usgseh, aber keni isch vor Gott besser oder het meh Wärt.

Gib nie uf: Dr Adler wird o Chünig vo de Lüft gnennt u sini einzige Feinde si eigentli dChräiene. Zum dene uszwiche, flügt är sowit ufe, bis ihm d’Chräiene wäg dr Höchi nüm chöi fouge. Bi üs chönnte Vergliche, Niid, Sexualität etc. so lästegi Chräiene sii. Doch we mir sötigi Sache bruche zum witer ufecho, de mache sie üs stärker. Dr Adler git si Kampf gäge d’Chräiene nie uf u so söue o mir dr Gloube a Jesus nie ufgäh.

Ewigi Liebi: We sich es Adlerpäärli mau für enang entschiede het, bliebe sie zämä bis a ds Ändi vo ihrem Läbe. So söus o bi üs Mönsche si. Mir gö e Ehe bis a ds Läbesändi ii. Aber das isch nume müglech, wiu Gott dGrundlag für e ewigi Beziehig gschaffe het. Mir liebe, wiu är üs zersch gliebt het u mir chöi vergäh, wiu är üs zersch vergäh het. Dermit e Beziehig cha wachse u bestah, bruchts wie scho gseit, e Pfleg. Gott isch üse bescht Fründ, wo üs nie wird enttüsche. Sini Liebi hautet ewig.

Fahr dini Flügu us u la di vo Jesus la triebe, wiu mir sie gebore zum flüge.